*شوربة فواكه البحر*
1/4 كيلو سبيط(كاليماري)
(تقولي للسماك يتنظفه و يقطعه للشوربه)
(او تقطعيه انت بس مكعبات كبيرة )
1/4 كيلو سمك فيليه
(لازم يكون سمك جامد علشان مايتهيريش في الشربة)
( قشربياض مثلا)
(ويقطع مكعبات كبيرة)
(السبيط و الجمبري لان دول اكثر حاجة زفرة تحطيهم في مية فيها شوية دقيق و ملح و ليمونتين كبار لمدة عشر دقائق مش اكتر)
1/4 كيلو كابوريا
(عملو 2 كبار و واحدة صغيرة)
(حطيها في شوية مية علشان لو في حاجة متعلقة بيها او فيها رمل و انت مش واخدة بالك)
1/4 جمبري وسط مقشر
(ده برضه حطيه في طبق في مية بس و سيبيه شويه علشان لو في قشر من بواقي التنظيف او أي شوائب اخري تطفوا علي وش المية و كده نقدر نشيلها بسهولة)
1/4 كيلو جندوفلي
(بلح البحر)
(الجزء اللي هنعمل بيه الشربة بس نحطه في طبق فيه ماية من الحنفية و نسيبه ساعتين علشان يفتح لوحده)
و نعمل الخلطة ديه و نركنها علي جنب
نصف حزمة كرفس+2جزر وسط مبشور+3 او 5 فصوص ثوم +ملح+فلفل+كمون+2 طماطم كبير+2 قرن فلفل اخضر(رومي)
الخلطة ديه نحطها في الكبة كله يتفرم مع بعضه
بس مش يبقي عصير لا هيكون مقطع ناعم و متجانس مع بعضه
نركن الخلطة ديه بأه لحد ما اقولكم عليها
نبدأ بأه في الطريقة
نجيب بصلة وسط و نبشرها و نحطها في حلة علي النار مع شوية زيت و عليها شوية ملح و فلفل و كمون
يادوب البصلة تبدأ تذبل نحط فواكه البحر الاجمد فالاقل و هكذا
يعني نحط السبيط المقطع و تقلب 3 دقائق
و نحط الكابوريا و الارجل بتاعتها و نقلب برضه 3 دقائق
(الكابوريا تكون مقسومة بالسكين نصفين بالطول و مقطعة الارجل)
و بعدين الأقل تسوية اللي هو الجندوفلي و برضه 3 دقائق و نقلب
و الجمبري المقشر برررضه 3 دقائق
و اخيراً السمك
و نقلب كويس في الاخر
و نسيبها 3 دقائق كده و نحط الخلطة بتاعتنا اللي عملناها في الاول و نشيل منها ملعقتين كبار علي جنب
و نقلب الخلطة كويس مع فواكة البحر علشان تتجانس و تتغلغل كويس
و بعدين نزود الماية و نسيبها تغلي دقيقتين علشان نتاكد من تجانس الحاجة مع بعض
(كل ده علي نار عالية عااادي جدا)
و نحط ملعقتين الخلطة اللي كنا شايلينهم علي جنب و نقلب كويس و ندوق علشان نشوف لو محتاجة ملح تاني ولا حاجة
و بمجرد ما تغلي تاني نطفي عليها و بالهنا و الشفا
و ممكن برضو تضيفيلها كريمة لو حبيتى بتديها طعم جميل اوى زى بتاعه كاستن بالظبط
ليست هناك تعليقات:
إرسال تعليق